មន្ដ្រីជាន់ខ្ពស់ នៃរាជរដ្ឋាភិបាល បានថ្លែងថាការមានគោលនយោបាយល្អ គឺមិនទាន់គ្រប់គ្រាន់ទេ តែក៏ត្រូវមានធនធានមនុស្សល្អ ដើម្បីសម្រេចនូវគោលនយោបាយ នេះផងដែរ។
ថ្លែងនៅក្នុងពិធីបិទ ការបូកសរុបចលនាគ្រូបង្រៀនទូទាំង ស្រុកត្រាំកក់ លោកច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទបានលើកឡើងថា មានគោលនយោបាយល្អ គឺមិនទាន់គ្រប់គ្រាន់ទេ បើពុំមានធនធានមនុស្សល្អ ដើម្បីអនុវត្ដនូវគោលនយោបាយ នោះប្រកបដោយប្រសិទ្ធភាព និងការទទួលខុសត្រូវ។
លោកបន្ដទៀតថា ហេតុដូចនេះហើយទើបរាជរដ្ឋាភិបាលយកចិត្ដទុកដាក់ក្នុងការលើកកម្ពស់វិស័យអប់រំក្នុងគោលដៅមួយជាក់លាក់។
ជាមួយនឹងការកោតសរសើរ ចំពោះការរួមចំណែករបស់លោកគ្រូអ្នកគ្រូនៅតំបន់ជនបទ លោករដ្ឋមន្ដ្រីបានថ្លែងទៀតថា ដើម្បីអនុវត្ដគោលនយោបាយរបស់រាជរដ្ឋាភិបាល គឺការបង្ហូរធនធានមនុស្សទៅកាន់តំបន់ជនបទសមស្របតាមតម្រូវការ គឺជាការងារដែលមានសារៈសំខាន់។ ដើម្បីអភិវឌ្ឍន៏ប្រទេស ឱ្យមានការរីកចម្រើនត្រូវការចាំបាច់នូវមនុស្ស ដែលមានចំណេះដឹងមានសមត្ថភាពល្អ។ អនាគតស្លាប់រស់របស់កម្ពុជា គឺពឹងផ្អែកទៅលើវិស័យអប់រំនេះឯង។
លោករដ្ឋមន្ដ្រីបានធ្វើការពន្យល់ទៀតថា សេដ្ឋកិច្ចនៅជនបទមានការប្រែប្រួលរីកចម្រើនពឹងផ្អែកលើធនធានមនុស្ស។ការប្រកួតប្រជែងលើទីផ្សារក៏ពឹងផ្អែកលើធនធានមនុស្សដែរពោលគឺធនធានមនុស្សជាកត្ដាគន្លឹះមិនអាចខ្វះបានក្នុងការជំរុញឱ្យប្រទេសមានការអភិវឌ្ឍន៏ដោយចីរភាព។
ពិធីជួបជុំនេះបានធ្វើឡើងកាលពីដើមសប្ដាហ៏កន្លងទៅនេះ ដោយមានលោកគ្រូ អ្នកគ្រូ នាយកសាលាគ្រប់ភូមិសិក្សានៅទូទាំងស្រុកត្រាំកក់ទាំងអស់ចូលរួម។ កិច្ចប្រជុំនេះដើម្បីស្វែងរកឱ្យឃើញពីចំណុចខ្លាំង និងខ្សោយ ក្នុងការជំរុញវិស័យអប់រំនៅជនបទមួយនេះ៕
