ទំនប់ទឹកចំនួន៣ដែលស្ថិត នៅឃុំត្រពាំងក្រញូវ ស្រុកត្រាំកក់ ត្រូវបានសម្ភោធកាលពីពេលថ្មីៗនេះ ខណៈដែលរដូវវស្សា នឹងចាប់ផ្ដើមនៅដើមខែឧសភានេះ។
លោក ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ និងសហការីរបស់លោកជាច្រើនរូប បានអញ្ជើញចូលរួមអបអរសមិទ្ធផលថ្មីនេះ។ ទំនប់ទាំង៣នេះមានទំនប់០២ ទំនប់តាអាំនិងទំនប់ក្រាំងអម្ពិល។
ជាទំនប់ខ្នាតតូចល្មមនៅជនបទ ដែលកសាងឡើងដោយ ថវិការរបស់ លោករដ្ឋមន្ដ្រីកសិកម្ម សរុបចំនួនជាង២០លានរៀល។ អ្នកភូមិចំនួនជាង២០០នាក់ ដែលចូលរួមក្នុងពិធីនេះ បានសម្ដែងនូវក្ដីរីរាយ ពីព្រោះគុណប្រយោជន៏របស់ទំនប់នេះ នឹងជួយដល់ការងារកសិកម្ម របស់ពួកគេក្នុងរដូវបង្កបង្កើនផល។
លោករដ្ឋមន្ដ្រី ច័ន្ទ សារុន បានថ្លែងប្រាប់អ្នកភូមិនៅក្នុងឱកាសនោះថានេះជាសមិទ្ធិថ្មីមួយទៀត របស់អ្នកឃុំត្រពាំងក្រញូង។ ដូចនេះត្រូវតែប្រើប្រាស់ធនធាននេះឱ្យមានប្រសិទ្ធភាព។ លោកបន្ដថាទឹកជាប្រភពនៃជីវិត។ មានទឹកគឺមានការរីកចម្រើនខាងវិស័យកសិកម្ម។
ការរីកចម្រើនខាងកសិកម្ម នឹងធ្វើឱ្យជីវភាពកសិករកាន់តែប្រសើរឡើង។ លោកបានស្នើ់រដល់ប្រជាជនអាជ្ញាធរមូលដ្ឋានឱ្យយកចិត្ដទុកដាក់ក្នុងការរៀបចំហេដ្ឋារចនាសម្ព័ន្ធទឹកក្នុងមូលដ្ឋានដោយមានការថែទាំប្រភពទឹកការគ្រប់គ្រងប្រភពទឹក ការស្វែងរកប្រភពទឹកនិងបង្កើតនូវប្រភពទឹក។ លោកបន្ដទៀតថាជាទូទៅកសិករយើងនៅខែវស្សាដែលមានភ្លៀងធ្លាក់មានទឹកគ្រប់គ្រាន់មិនសូវយកចិត្ដទុកដាក់គ្រប់គ្រងទឹកឱ្យបានល្អទេ ដោយទុកឱ្យទឹកហូរចោល ដោយពុំមានការគ្រប់គ្រង។ ដូចនេះត្រូវតែផ្លាស់ទម្លាប់នេះចេញ។
លោករដ្ឋមន្ដ្រីបានណែនាំឱ្យមន្ទីរកសិកម្មខេត្ដចុះជួយដល់កសិករដោយបើកវគ្គដាំដំណាំផ្សេងៗដើម្បីឱ្យកសិករទទួលបានចំណេះដឹងថ្មីថែមទៀត។ក្នុងពេលនោះលោកក៏បានដោះស្រាយសំណូមពររបស់អ្នកភូមិដែលសុំប្រឡាយជាង៦០០ម៉ែត្រនិងលូចំនួន២កន្លែង៕
