លោករដ្ឋមន្ត្រីក្រសួងកសិកម្ម ច័ន្ទ សារុន បានធ្វើការក្រើនរំលឹកដល់កសិករថា នៅពេលដែលមានទឹកត្រូវតែចេះគ្រប់គ្រងប្រើប្រាស់ឱ្យបានល្អ ជាមួយនឹងការធ្វើការដាំដុះដំណាំផ្សេងៗឱ្យបានគ្រប់រដូវ។
កាលពីពេលថ្មីៗនេះ លោកច័ន្ទ សារុន បានអញ្ជើញចូលរួមសម្ភោធស្រះទឹកសហគមន៏នៅភូមិអង្គត្រាវ ឃុំត្រាំកក់។ នៅទីនោះលោកបានកោតសរសើរដល់អ្នកភូមិដែលបានចូលរួមកសាងស្រះទឹកដ៏ធំបង្គួរនេះឡើង ខណះដែលនៅពេលខាងមុខ ស្រះនេះនឹងក្លាយជាប្រភពទឹកមួយនៅក្នុងមូលដ្ឋាន។ លោកបានបន្តថា មានស្រះហើយត្រូវតែគ្រប់គ្រងនិងប្រើប្រាស់ទឹកនេះអោយបានល្អសមស្រប និងមានប្រសិទ្ធភាព។ ស្រះទឹកត្រូវតែមានអនាម័យ និងមានការដាំដើមឈើផងដែរ។ លោកបានរំលឹកទៀតថា មានទឹកហើយក៏ត្រូវតែមានការដាំដុះ ពោលគីប្រែក្លាយផ្ទៃដីទំនេរអោយទៅជាពណ៌បៃតងគ្រប់រដូវ។
ប្រាការនេះនឹងធ្វើឱ្យយើងមានចំណូលបន្ថែមក្នុងគ្រួសារ ហើយគ្រប់គ្រួសារមិនត្រូវពឹងផ្អែកតែលើដំណាំស្រូវមួយមុខទេ តែត្រូវមានមុខរបរផ្សេងទៀតដូចជាដាំបន្លែ ចិញ្ចឹមសត្វ ចិញ្ចឹមត្រី ឬមុខរបរផ្សេងទៀតដែលមិនចាំបាច់ការធ្វើចំណាកស្រុក។ កសិករត្រូវតែឈានខ្លួនពីកសិករទៅជាកសិឧស្សាហករណ៏ដែលមានន័យថាមិនមែនធ្វើស្រែដើម្បីហូបតែមួយទេ តែក៏ត្រូវធ្វើឱ្យទៅជាការធ្វើពាណិជ្ជកម្ម។
តាមរយះរបាយការណ៍របស់មន្ត្រីកសិកម្មខេត្តបានឱ្យដឹងថា ឃុំនេះជាឃុំគំរូមួយក្នុងការអនុវត្តន៍ ប.វ.ស. ដែលក្នុងនោះមានកសិករម្នាក់បានក្លាយជាកសិករគំរូទូទាំងប្រទេស ក្នុងសន្និបាតកសិករកាលពីពេលកន្លងទៅថ្មីៗនេះ។ លោករដ្ឋមន្ត្រីបានមានប្រសាសន៏ផងដែរ ដោយលើកទឹកចិត្តជំរុញការធ្វើ ប.វ.ស ពីគ្រួសារមួយទៅគ្រួសារមួយ ពីឃុំមួយទៅឃុំមួយ ដោយកសិករដែលមានពិសោធន៍ជួយដល់កសិករដែលពុំទាន់មានពិសោធន៍។
ស្រះទឹកដែលសម្ភោធនោះ មានទំហំ៥០គុណនឹង៣០ម៉ែត្រ ជម្រៅ៣ម៉ែត្រ។