កម្មវិធីទី១៖ថ្ងៃទី២៤ ខែវិច្ឆិកា ឆ្នាំ២០២២ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យផលិតកម្មបន្លែ នៅភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ -------------------------------------------------------------------------- នាព្រឹកថ្ងៃព្រហស្បតិ៍ ១កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែវិច្ឆិកា ឆ្នាំ២០២២ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងសហការីអមដំណើរបានចុះពិនិត្យបណ្តុំអាជីវកម្មបន្លែរបស់កម្មវិធីASPIREនៅភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ ដើម្បីស្វែងយល់ពីបញ្ហាប្រឈម និងរកដំណោះស្រាយឆ្លាតវៃក្នុងការឆ្លើយតបនឹងតម្រូវការទីផ្សារ។ បន្ទាប់ពីបានជជែកពិភាក្សាជាមួយក្រុមកសិករ និងអ្នកប្រមូលទិញរួចមក ឯកឧត្តមរដ្ឋមន្ត្រី បានផ្តល់ជាគំនិតដល់កសិករ ត្រូវស្វែងយល់ពីផែនការអាជីវកម្ម ដើម្បីជៀសវាងការផលិតលើសពីតម្រូវការទីផ្សារ។ ក្នុងនោះដែរ ឯកឧត្តម ក៏បានលើកឡើងថា ការចងក្រងជាក្រុម ឬជាសហគមន៍កសិកម្មគឺមានសារៈសំខាន់ ព្រោះកសិករអាចសហការគ្នាក្នុងការរៀបចំប្រតិទិនដាំដុះដំណាំបន្លែដើម្បីឆ្លើយតបនឹងតម្រូវការទីផ្សារ ហើយថែមទាំងមានឥទ្ធិពលក្នុងការចរចារតម្លៃទីផ្សារជាមួយឈ្មួញផងដែរ។ ដោយឡែកសម្រាប់ មន្ទីរកសិកម្ម រុក្ខាប្រមាញ់ និងនេសាទ ឯកឧត្តម បានលើកឡើងថា ត្រូវជួយសម្របសម្រួលជាមួយក្រុមហ៊ុនផ្គត់ផ្គង់ផ្ទះសំណាញ់ និងក្រុមហ៊ុនប្រមូលទិញបន្លែដើម្បីផ្តល់ផ្ទះសំណាញ់ឱ្យប្រជាកសិករអាចផលិតបានពេញមួយឆ្នាំ ក្នុងរូបភាពកាត់រំលស់ជាមួយថ្លៃបន្លែដែលប្រមូលទិញទៅតាមដំណាក់កាលឬតាមវដ្ដនៃផលិតកម្មបន្លែនោះ ដោយមិនត្រូវឱ្យពួកគាត់ទៅខ្ចីឥណ្ឌទានជាមួយស្ថាប័នមីក្រូហិរញ្ញវត្ថុឡើយ៕
