ផ្លូវលំវែងជិត២គីឡូម៉ែត្រ ដែលតភ្ជាប់ពីភូមិពោធិដុះទៅភូមិសំរង ក្នុងឃុំត្រពាំងធំខាងជើង ស្រុកត្រាំកក់ បានបញ្ចប់ការសាងជាស្ថាពរ។ មន្ដ្រីជាន់ខ្ពស់ដែលចូលរួមក្នុងការកសាង និងចូលរួមសម្ពោធផ្លូវនេះ បានអំពាវនាវឱ្យប្រើប្រាស់សមិទ្ធិនេះ ដើម្បីជាប្រយោជន៏ក្នុងការអភិវឌ្ឍន៏មូលដ្ឋានដោយពិតប្រាកដ។ ផ្លូវនេះមានប្រវែង១.៤៩៨ម៉ែត្រ។
ប្រជាជនដែលទទួលផលមកពីភូមិ ចំនួន២ ប្រមាណ១៥០នាក់ បានសម្ដែង នូវក្ដីអំណរចំពោះ លោករដ្ឋមន្ដ្រីក្រសួងកសិកម្ម ច័ន្ទ សារុន ដែលបានចំណាយធនធាន ពេលវេលា ក្នុងការរួមចំណែកកសាងផ្លូវលំនេះឡើង ហើយដែលសំខាន់ជាងនេះ គឺលោកបានជួយដល់ពួកគេនូវការផ្លាស់ប្ដូរទម្លាប់មួយក្នុងការធ្វើកសិកម្ម ពីការធ្វើដោយរបៀបតៗគា្នដែលមិនសូវទទួលផលមកជាការធ្វើស្រែដែលមានបច្ចេកទេសនិងទទួលបានផលច្រើន។
លោករដ្ឋមន្ដ្រីក្រសួងកសិកម្មដែលអញ្ជើញចូលរួមក្នុងពិធីដោយផ្ទាល់ កាលពីពេលថ្មីៗនេះ បានប្រាប់ដល់ប្រជាជនដែលមានវត្ដមាននៅទីនោះថា នៅពេលនេះអ្នកឃុំត្រពាំងធំខាងជើង បានទទួលនូវសមិទ្ធផលថ្មីមួយទៀត បន្ថែមលើអ្វីជាច្រើនដែលបានទទួលកន្លងមក។ វាជាលទ្ធផលនៃការរួមសាមគ្គីគ្នាដែលគេត្រូវតែបន្ដប្រពៃណីនេះតទៅទៀត។
លោកបានបន្ដថា លោកបានមកឃុំត្រពាំងខាងជើងចំនួន១០៥ដង គិតទាំងលើកនេះដើម្បីមករួមជួយដោះស្រាយការលំបាករបស់ប្រជាជនតាមរយះការអភិវឌ្ឍន៏ផ្សេងៗទាំងអាណាចក្រ ក៏ដូចជាពុទ្ធចក្រ ហើយជាមោទនៈ គឺឃុំមានការប្រែប្រួលថ្មីពិតប្រាកដមែន។លោកសំណូមពរឱ្យបន្ដស្មារតីនេះតទៅទៀតដើម្បីបញ្ចប់ភាពក្រីក្រត្រឹមត្រូវជំនាន់យើងនេះ។
លោកបានពន្យល់ផងដែរ ពីមូលហេតុដែលលោកយកចិត្ដទុកដាក់ខ្លាំងលើការកសាងហេដ្ឋារចនាសម្ព័ន្ធផ្លូវធារាសាស្ដ្រនៅជនបទ ពីព្រោះថានេះគឺជាមធ្យោបាយដែលធ្វើឱ្យប្រជាជនអាចបង្កើនចំណូលសម្រាប់គ្រួសារបង្កើនមុខរបរថ្មីបន្ថែម និងកាត់បន្ថយចំណាកស្រុក។ លោកបានស្នើឱ្យប្រជាជនចូលរួមថែរក្សាផ្លូវលំមួយនេះ ក៏ដូចជាសមិទ្ធិដទៃទៀតឱ្យបានល្អប្រយោជន៏គង់វង្សយូរអង្វែង និងប្រើប្រាស់ផ្លូវនេះដើម្បីកែប្រែជីវភាពគ្រួសារពិតប្រាកដ៕
