ស្រះទឹកសហគមន៏ ចំនួនពីរកន្លែង ត្រូវបានធ្វើពិធីប្រគល់ជូន ប្រជាជនប្រើប្រាស់ ដោយលោក ច័ន្ទសារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ កាលពី ព្រឹកថ្ងៃអាទិត្យ ទី១៦ ឧសភា ឆ្នាំ២០១០ កន្លងទៅ។
ស្រះទឹកទាំងពីកន្លែង ត្រូវបានកសាងដោយលោក ខេង រ៉ា និងលោកស្រី អ៊ុក រីតា និងមានការគាំទ្រថវិការផងដែរពីលោកឧញ៉ា ខេង សុមេធ និងលោកស្រីទីប្រឹក្សាផ្ទាល់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។
ស្រះទឹកនេះ គឺបានប្រគល់ ជូនប្រជាជនភូមិគោចិនលែង និងមួយកន្លែងទៀត ប្រគល់ជូន ប្រជាជនភូមិត្រពាំងកោះ ស្ថិតក្នុងត្រពាំងធំខាងត្បូង ស្រុកត្រាំកក់ ខេត្ដតាកែវ។
លោកខេង រ៉ា បាននិយាយថា ស្រះទឹកទាំងពីរគឺត្រូវបានប្រជាជនក្នុងភូមិទាំងពីរសំណូមពរឱ្យស្ដាជាថ្មីឡើងវិញ បន្ទាប់ពីស្រះទឹកទាំងនេះត្រូវបានគោករាក់អស់។
លោកបន្ដថា ស្រះទឹកទី១ នៅភូមិគោចិនលែង មានទំហំ៣៥ម៉ែត្រ គុណ ២១ម៉េត្រ ជម្រៅ ២,៥ម៉ែត្រ ដោយចំណាយអស់ថវិការ៥លាន៥សែនរៀល។ ក្នុងឱកាសបើកសម្ភោធស្រះទឹកពីរកន្លែងនេះ លោកច័ន្ទ សារុន បានមានប្រសាសន៏ថា នេះជាសមិទ្ធផល ដែលឃុំត្រពាំងធំខាងត្បូងទទួលបានដើម្បីទាញប្រយោជន៏ទឹកមកប្រើប្រាស់ឱ្យអស់លទ្ធភាព។
លោកបានបន្ដថា រដូវវស្សាចាប់ចូលមកដល់ហើយ គឺនៅថ្ងៃទី១៥ ខែឧសភានេះ ហេតុនេះប្រជាជនត្រូវមើលពូជស្រូវ មើលជីឱ្យបានគ្រប់គ្រាន់ និងពិសេសប្រភពទឹក។
លោករដ្ឋមន្ដ្រីបញ្ជាក់ថា បន្ដិចទៀតប្រជាកសិករ នឹងទទួលបានទឹកភ្លៀង”មានស្រះត្រូវមានទឹក ត្រូវមានត្រី មានទឹកត្រូវមានដំណាំ” ដែលពាក្យស្លោកទាំង៣ប្រជាកសិករត្រូវតែចងចាំ ហើយអនុវត្ដឱ្យបាន។
ជាមួយនឹងការដាស់តឿនដល់កសិកររបស់លោកនាពេលនោះ លោក ច័ន្ទ សារុន ក៏ប្រាប់កសិករផងដែរថា បញ្ហាជីក៏ត្រូវពិនិត្យឱ្យបានច្បាស់លាស់ ហើយត្រៀមទុកឱ្យបានជាប្រចាំ ហើយកុំប្រញាប់ប្រញាល់យកទៅដាក់ស្រែពេក ព្រោះថាជីធម្មជាតិ កសិករត្រូវធ្វើយ៉ាងណាឱ្យវារលាយក្លាយជាជីពិតប្រាកដ ហើយ ចាំយកទៅដាក់ស្រែ តាមអ្វីដែលក្រុមបច្ចេកទេសណែនាំ។
ជាមួយគ្នានោះ លោករដ្ឋមន្ដ្រីកសិកម្មក៏បានប្រាប់ដល់កសិករ កុំឱ្យប្រើប្រាស់ជីគីមី ដែលជាប្រការមិនល្អឡើយ ព្រោះកសិករខ្លះប្រើជីគីមី ទៅតាមអ្វីដែលចិត្ដចង់ហើយធ្វើតាមគ្នា។
លោកច័ន្ទ សារុន ក៏បានផ្ដាំផ្ញើរឱ្យប្រជាជនក្នុងសហគមន៏ត្រូវចេះថែទាំស្រះឱ្យបានល្អ ព្រោះថាស្រះទាំអស់នោះជារបស់ពួកគាត់ទាំងអស់សម្រាប់ថែទាំ និងយកទឹកមកប្រើប្រាស់ឱ្យអស់លទ្ធភាព៕
