ក្រោយពីបានជួបសំណេះសំណាល និងពិធីចែកកូនត្រីអណ្តែង កូនកង្កែប និងចំណីជូនកសិករនៅឃុំបុស្បូវ រួចមក ឯកឧត្តមរដ្ឋមន្រ្តី និងឯកឧត្តមអភិបាលនៃគណៈអភិបាលខេត្តបានអញ្ជើញបន្តចុះពិនិត្យ ចំការដំណាំត្រសក់ផ្អែម ឪឡឹកលឿង របស់កសិករ ធួន ព័រ នៅភូមិ គោករំដួលសង្កាត់សំរោង ក្រុងសំរោង ខេត្តឧត្តរមានជ័យ
កសិករ ធួន ព័រ ចាប់ផ្តើមដាំបន្លែ តាំងពីឆ្នាំ ២០១២ ក្រោមការជួយ គាំទ្រ បណ្តុះបណ្តាល បច្ចេកទេស ពី អង្គការ IDE សហការជាមួយមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ ។
ពីដំបូងឡើយ គាត់មានជីវភាព លំបាក ប្រកបមុខរបរ ធ្វើស្រែចំការ ដើម្បីផ្គត់ផ្គង់ជីវភាព ប្រចាំថ្ងៃ តែដោយមានចិត្តស្រលាញ់ លើមុខរបរកសិកម្ម លោកតែងតែចូលរួម រាល់សកម្មភាពនានា ដែលពាក់ព័ន្ធនិងការសិក្សា រៀនសូត្រ ពីការងារ ចិញ្ចឹមសត្វ និង ដាំដុះ ។
ឆ្លងតាម ការខិតខំ ទាំងទ្រឹស្តី និងអនុវត្តផ្ទាល់រហូតមកទល់ពេលនេះ ក្រុមគ្រួសារគាត់ មានប្រាក់ចំណូលពី ការដាំដុះ ល្អប្រសើរឡើងជាបន្តបន្ទាប់ រហូតមានប្រាក់ សាងសង់ផ្ទះបានសមរម្យ ទិញដីស្រែបាន ១០ ហិកតា និង ដីចំការបាន ៤,៥ ហិកតា និង មានគោ ក្របី ជាង២០ ក្បាលបន្ថែមទៀត ។ ជាមធ្យមគ្រួសារកសិករនេះ អាចរកប្រាក់ចំណូលបានក្នុងមួយឆ្នាំប្រមាណ ២៨ ០០០ដុល្លារអាមេរិក។
ឯកឧត្តមរដ្ឋមន្រ្តី បានសម្តែងនូវក្តីភា្ញក់ផ្អើល និងត្រេកអរ ដែលបានមកឃើញចំការត្រសក់ផ្អែម និងឪឡឹកលឿង របស់កសិករ ធួន ពរ។ ឯកឧត្តមរដ្ឋមន្រ្តី បានវាយតម្លៃខ្ពស់ចំពោះសមត្ថភាពរបស់លោក ធួន ពរ ដែលបានឧស្សាហ៍ព្យាយាមក្នុងការរៀបចំហេដ្ឋារចនាសម្ព័ន្ធ និងការរៀបរយការដាំដុះបានល្អប្រសើរ ឈានដល់ការពង្រីកខ្លួនក្នុងវិស័យកសិកម្មបានចំណូលក្នុងកម្រិតមួយគួរឱ្យកត់សម្គាល់។ ឯកឧត្តមរដ្ឋមន្រ្តី បានធ្វើការលើកទឹកចិត្តដល់លោក ធួន ពរ និងក្រុមគ្រួសារ បន្តពង្រីកការដាំដុះបន្ថែមទៀត និងបានណែនាំឱ្យមន្ទីរ ជួយសម្របសម្រួលក្នុងការពង្រឹងយន្តការទីផ្សារជូនកសិករផងដែរ។
