ក្រុមហ៊ុនគ្រីនរីច បានអះអាងពីទិសដៅរបស់ខ្លួនដែលនឹងផលិតកូនឈើឱ្យបាន ចំនួន២លានដើម ហើយទីនោះអាចនឹងក្លាយទៅជាសួនបណ្ដុះកូនឈើដ៏ធំជាងគេ នៅប្រទេសកម្ពុជាផងដែរ
កាលពីចុងខែឧសភាកន្លងទៅនេះ លោកច័ន្ទ សារុន រដ្ឋមន្ដ្រីក្រសួងកសិកម្មរុក្ខាប្រមាញ់និងនេសាទ និងគណៈប្រតិភូអមដំណើរ បានចុះពិនិត្យស្ថានីយបណ្ដុះដាំនិងកែឆ្នៃឈើរបស់ក្រុមហ៊ុនគ្រីនរីច(Green Rich) ដែលមានទីតាំងស្ថិតនៅក្នុងភូមិ កោះកុងក្នុងឃុំត្រពាំងរូងស្រុកកោះកុង។
មន្ដ្រីខុទ្ទកាល័យរបស់លោករដ្ឋមន្ដ្រី បានប្រាប់រស្មីកម្ពុជា កាលពីព្រឹក ថ្ងៃទី២ ខែមិថុនា នេះថា ខណៈនៃការពិនិត្យសកម្មភាពនៅទីនោះ មន្រី្ដរបស់ក្រុមហ៊ុនបានជម្រាបលោករដ្ឋមន្ដ្រីថា សកម្មភាពរបស់ក្រុមហ៊ុន នាពេលបច្ចុប្បន្ន បានផ្ដោតទៅលើសកម្មភាពសំខាន់៤គឺៈ ការបណ្ដុះកូនឈើ ការដាំឈើការដកហូតឈើ និងការផលិតជាដំណាំឈើ(Wood chip)។ ក្រៅពីនេះក្រុមហ៊ុនបានចូលរួមសកម្មភាពសង្គមមួយចំនួនទៀតដូចជា ជួសជុលសាលារៀន ផ្លូវជាដើម។
នាពេលអនាគតក្រុមហ៊ុនមានទិសដៅផលិតកូនឈើឱ្យបានចំនួន២០លានកូន ដើម្បីដាំសម្រាប់បម្រើឱ្យសង្វាក់ផលិតកម្មរបស់ខ្លួន ហើយនេះក៏អាចជាកន្លែងបណ្ដុះកូនឈើធំជាងគេនៅកម្ពុជាផងដែរ។ ការដាំឈើរបស់ក្រុមហ៊ុន មានពីរផ្នែកគឺការដាំឈើរបស់ក្រុមហ៊ុន និងការដាំលើដីរបស់ប្រជាពលរដ្ឋដែលទំនេរ។
មន្ដ្រីខាងលើបានឱ្យដឹងទៀតថា លោករដ្ឋមន្ដ្រីបានកោតសរសើរដល់ក្រុមហ៊ុន ដែលបានខិតខំប្រឹងប្រែងលើការងាររបស់ខ្លួន និងបានយកចិត្ដដាក់លើកស្ទួយកម្រិតជីវភាពរបស់ប្រជាជន ហើយសូមឱ្យក្រុមហ៊ុនជំរុញការងារនេះបន្ថែមទៀត។លោកបានជំរុញឱ្យក្រុមហ៊ុនធ្វើការដាំឈើឱ្យបានតាមផែនការ។
ជាមួយនឹងអ្វីដែលកំពុងដំណើរការនៅទីនោះ លោករដ្ឋមន្ដ្រីបានផ្ដល់ជាអនុសាសន៏ថា ក្រុមហ៊ុនគួរបណ្ដុះកូនឈើដែលផ្ដល់ទិន្នផលខ្ពស់ ហើយឱ្យប្រជាជនដាំលើដីដែលនៅទំនេរ។ ជួយផ្ដល់ការងារឱ្យប្រជាជនធ្វើ តាមរយះការចិញ្ច្រាំងជាចំណាំងឈើ ដោយពិនិត្យគុណភាពពីក្រុមហ៊ុន។ ក្រុមហ៊ុនត្រូវសហការជាមួយរដ្ឋបាលព្រៃឈើ និងរដ្ឋបាលជលផលដើម្បីដឹងថា តើការសហការដាំដុះឈើជាមួយប្រជាជនពិតជាដាំដីកម្មសិទិ្ធស្របច្បាប់របស់ប្រជាជនឬក៏ជាដីដែលស្ថិតនៅក្រោមការគ្រប់គ្រងរបស់រដ្ឋបាលព្រៃឈើ ឬរដ្ឋបាលជលផល។ ប្រសិនបើដាំលើដីកម្មសិទ្ធិស្របច្បាប់របស់ប្រជាជននោះវាជាគំរូមួយដ៏ល្អ។ ជំរុញឱ្យក្រុមហ៊ុនយកព្រៃចិញ្ចឹមព្រៃ ដែលមានន័យថា ក្រុមហ៊ុនអាចសហការជាមួយស្ថានីយបណ្ដុះកូនឈើរបស់រដ្ឋបាលព្រៃឈើដើម្បីធ្វើការបណ្ដុះនិងដាំ។
លោករដ្ឋមន្ដ្រីក៏បានជំរុញឱ្យក្រុមហ៊ុនបង្កើតជាមជ្ឈមណ្ឌលមួយធ្វើការសិក្សាបង្កាត់ពូជឈើថ្មី ដែលអាចដុះលូតលាស់លឿនហើយផ្ដល់ផលខ្ពស់ ហើយដែលអ្នកបច្ចេកទេសអាចសហការគ្នារវាងអ្នកបច្ចេកទេសចិន និងអ្នកបច្ចេកទេសកម្ពុជា។ក្រុមហ៊ុនយកចិត្ដទុកដាក់គិតគូរពីសាលារៀនរបស់កូនកម្មករ ផ្ទះស្នាក់នៅ សុខភាព និងអនាម័យរបស់កម្មករផងដែរ។ លោកបានជំរុញឱ្យក្រុមហ៊ុនមិនត្រឹមតែផលិតជាចំណាំងឈើប៉ុណ្ណោះទេ តែថែមទាំងផលិតម្សៅក្រដាស់ទៀរនិងសូមឱ្យ្ឮក្រុមហ៊ុនប្រើប្រាស់អ្នកបច្ចេកទេសក្នុងស្រុកដូចជានិស្សិតដែលទើបបញ្ចប់ការសិក្សាជាដើម៕
