កាលពីព្រឹកថ្ងៃទី១០ ខែវិច្ឆិកា ឆ្នាំ២០១០ គណះប្រតិភូក្រុមប្រឹក្សាអភិវឌ្ឍន៍វិស័យកសិកម្ម និងជនបទ ដឹកនាំដោយឧបនាយករដ្ឋមន្ត្រី យឹម ឆៃលី អមដំណើរដោយឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ប៉ែន អ៊ាន អភិបាលរងខេត្តកំពង់ចាម ព្រមទាំងប្រតិភូអមដំណើរ ថ្នាក់ដឹកនាំអង្គភាពនាយកដ្ឋានពាក់ព័ន្ធ លោក Eric Beugnot នាយកទីភ្ងាក់ងារបារាំង សម្រាប់ការអភិវឌ្ឍន៍ (AFD) តំណាងអង្គការ USAID AusAIDEUIFC GTZDED និងមន្ត្រីបច្ទេកទេសមួយចំនួន បានអញ្ជើញចុះពិនិត្យចម្ការបង្ហាញ នៃការអនុវត្តន៍បច្ទេកទេស DMC (Direct Seedling Mulch Based Cropping Systems) នៅភូមិពន្លាក និងភូមិស្វាយប៉ាក ឃុំចុងជាច ស្រុកតំបែរ ដើម្បីពិនិត្យកសិដ្ឋានផលិតពូជពោតចំណាំចម្ការលើ និងចម្ការបង្ហាញ និងការផ្សព្វផ្សាយបច្ចេកទេស DMC នេះ នៅភូមិសំព័រ បូសថ្លាន់ និងភូមិមហា ឃុំបុសខ្នុរ ស្រុកចម្ការលើ។
ការអនុវត្តន៍បច្ចេកវិជ្ជា នៃការដាំដុះផ្ទាល់ ដោយមិនភ្ជូររាស់លើសំណល់ នៃដំណាំគម្រង DMC ចាប់តាំងពីឆ្នាំ២០០៤ ដែលនៅពេលនោះ បច្ចេកវិជ្ជានោះស្ថិតនៅក្នុងផ្នែកពិពិធកម្មដំណាំ នៃគម្រោងអភិវឌ្ឍន៍កៅស៊ូគ្រួសារ ក្រោមការទទួលរបស់អគ្គនាយកដ្ឋានកៅស៊ួ ដែលផ្តល់ហិរញ្ញប្បទាន ដោយទីភ្នាក់ងារបារាំង សម្រាប់ការអភិវឌ្ឍន៍(AFD) និងិវទ្យាស្ថាន CIRAD នៃប្រទេសបារាំង។
នៅចុង ខែមិថុនា នាឆ្នាំ២០០៨ ផ្នែកពិពិធកម្មនេះ ត្រូវបានផ្ទេរអោយស្ថិតនៅក្រោមការគ្រប់គ្រង របស់នាយកដ្ឋានក្សេត្រសាស្ត្រ និងកែលំអដីកសិកម្មវិញ ដោយមានឈ្មោះថា PADAC ដោយមានរយៈពេល ៤ឆ្នាំ (២០០៨-២០១០)។ ការងារសំខាន់ គឺការស្រាវជ្រាវ និងផ្សព្វផ្សាយបច្ចេកទេស DMC នៅលើដីក្រហម ដីខ្មៅ និងដីខ្សាច់នៃតំបន់ខ្ពង់រាប ខេត្តកំពង់ចាម និងបន្តទៅតំបន់ផ្សេងដូចជា ខេត្តបាត់ដំបង និងប៉ៃលិន ដោយផ្អែកជាសំខាន់ទៅលើដំណាំចម្បងៗរួមមាន ដំឡូងបី ពោត សណ្តែក និងស្រូវនៅតំបង់ខ្ពង់រាប ដែលពឹងផ្អែកទាំងស្រុង ទៅលើរបបទឹកភ្លៀង និងការដាំស្រូវនៅលើតំបន់ដីខ្សាច់ និងវាលទំនាប។
ប្រព័ន្ធកសិកម្ម DMC បានធ្វើអោយមានការអភិវឌ្ឍន៍កសិកម្ម ប្រកបដោយនិរន្តរភាព នៅលើផ្ទៃដីធំៗ ដែលពីមុនគ្មានជីជាតិ និងមិនអាចធ្វើកសិកម្មបាន។ នៅក្នុងឆ្នាំ២០១០នេះ គម្រោងបានអនុវត្តការងារពិសោធន៍ និងបង្ហាញនៅខេត្តកំពង់ចាម ក្នុងស្រុកពីរគឺស្រុកចំការលើ បានចំនួន៥២ហិចតា និងស្រុកតំបែរបាន ៨ហិចតា។
នៅខេត្តបាត់ដំបង ក្នុងស្រុករតនមណ្ឌល បានចំនួន៥,៥ហិចតា ហើយគម្រោងបានចងក្រងបណ្តាញកសិករ ដើម្បើអនុវត្តបច្ចេកវិជ្ជានេះ បានចំនួន ២៩៤គ្រួសារលើផ្ទៃដី១៤៩,៥៧ហិចតា។ ឯកឧត្តមរដ្ឋមន្ត្រី ក្រសួងកសិកម្ម បានបញ្ជាក់បន្ថែម នូវគោលការណ៍សំខាន់ទាំងបី នៃបច្ចេកទេស DMCនេះ រួមមានជួយកាត់បន្ថយចំណាយលើកម្លាំងពលកម្ម ក្នុងការរៀបចំ ការចំណាយប្រើប្រាស់ទឹក ដោយសន្សំសំចៃ អោយចំទិសដៅ និងអោយមានប្រសិទ្ធភាពក្នុងកាលៈទេសៈ នៃបប្រែបម្រួលអាកាសធាតុ។
ជួយអោយដីកាន់តែមានពពួកសត្វល្អិត និងការបម្លែងសារធាតុសរីរាង្គក្នុងដី ទៅជាសារធាតុចិញ្ចឹមសម្រាប់ដំណាំ។ ឯកឧត្តមរដ្ឋមន្ត្រីបន្តទៀតថា រាជរដ្ឋាភិបាលកម្ពុជាក្រោមការដឹកនាំ ប្រកបដោយគតិបណ្ឌិតរបស់សម្តេចតេជោ ហ៊ុន សែន ជាប្រមុខបានកំណត់ច្បាស់លាស់ នូវសក្តានុពលដ៏ធំធេង នៃវិស័យកសិកម្ម សម្តេចចង់អោយកម្ពុជា ក្លាយជាជង្រុកស្រូវនៅក្នុងតំបន់ សម្រាប់ការនាំចេញទៅលក់នៅក្រៅប្រទេស។
វិស័យកសិកម្ម បានដើរតួរយ៉ាងសំខាន់ ក្នុងការជំរុញកំណើនសេដ្ឋកិច្ច ក្នុងបរិបទដែលកម្ពុជា បានរងនូវវិបត្តិហិរញ្ញវត្ថុសកល នៃផលិតផលក្នុងស្រុក៣០%។ គណៈប្រតិភូ បានចុះពិនិត្យចម្ការពិសោធន៍ ជាលក្ខណៈទ្រង់ទ្រាយធំ និងតូច គឺខ្នាតធំនៅកសិដ្ឋានផលិតពូជដំណាំតំបន់ដីខ្ពស់ នៅឃុំបុសខ្នុរ ខេត្តកំពង់ចាម ដោយពិនិត្យផងដែលនូវម៉ាសីនដាំពោត សណ្តែកសៀង ស្រូវលើកាកសំណល់ដំណាំគម្របដីខ្នាតតូចនិងធំ។
រីឯខ្នាតតូចវិញនៅភូមិសហគ្រាស ឃុំចម្ការអណ្តូង ខេត្តកំពង់ចាម។ ការពិសោធន៍នេះមានរយះពេល៧ឆ្នាំមកហើយ ដោយបានធ្វើការប្រៀបធៀបការដាំដុះតាម DMC ជាមួយនឹងការដាំដុះ តាមទម្លាប់របស់កសិករដោយភ្ជួររាស់។ ការពិសោធន៍បានផ្តោត ទៅលើប្រព័ន្ធដាំដុះពូជស្រូវចម្ការ ពោត សណ្តែកសៀង ដំឡូងមីចម្រុះ និងការដាំឆ្លាស់ជាមួយដំណាំគម្របដី។
