ការផលិតចំណីសត្វរបស់សហគមន៍អភិវឌ្ឍន៍កសិកម្មចម្រុះថ្លាត ដែលមានទីតាំង នៅក្នុងឃុំថ្លាត ស្រុកអន្លង់វែង បានទទួលការលើកទឹកចិត្តពីសំណាក់លោក ច័ន្ទ សារុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ។
យោងតាមរបាយការណ៍របស់ប្រធានសហគមន៍បានឱ្យដឹងថា សហគមន៍នេះបានដំណើរការងារមួយចំនួន ដូចជាការផលិតចំណីសត្វ ការបន្សុទ្ធពូជស្រូវ ការផលិតថ្នាំពុលធម្មជាតិ សម្រាប់បណ្ដេញសត្វចង្រៃ ការផលិតជីធម្មជាតិ ។ល។
មន្ត្រីខុទ្ទកាល័យលោករដ្ឋមន្ត្រីបានប្រាប់រស្មីកម្ពុជា កាលពីព្រឹក ថ្ងៃទី២២ ខែឩសភា ខណៈដែលលោករដ្ឋមន្ត្រីទៅជួបកសិករ និងអ្នកផលិតនៅទីនោះ លោកបានធ្វើការកោតសរសើរដល់ប្រជាជន ដែលបានខិតខំប្រឹងប្រែងធ្វើការទោះជានៅមានការលំបាកមួយចំនួនក្ដី ហើយក៏បានសូមឱ្យប្រជាជនខិតខំធ្វើការបន្តទៀត ដើម្បីធានាបាននូវនិរន្តរភាពការងាររបស់សហគមន៍ ព្រោះថាមានការងារច្រើនដែលអាចធ្វើបានដូចជាការផលិតពូជស្រូវ ផលិតពូជត្រី ជាដើមដែលនេះក៏អាចជាមុខរបរផ្សេងទៀតក្រៅពីធ្វើស្រែ។
លោករដ្ឋមន្ត្រីក៏បានណែនាំប្រជាជននៅក្នុងសហគមន៍ ឱ្យផលិតនូវពួជអ្វីដែលទីផ្សារត្រូវការ។ ប្រសិនបើបងប្អូនមិនចេះហើយចង់ចេះ និងចង់ទៅធ្វើទស្សនកិច្ចសិក្សានៅតំបន់ផ្សេង ដើម្បីដកស្រង់នូវបទពិសោធន៍ល្អៗ ពីកន្លែងផ្សេងៗនោះលោករដ្ឋមន្ត្រី នឹងជួយលើបញ្ហានេះ។
លោករដ្ឋមន្ត្រីក៏បានសំណូមពរឱ្យមានសាមគ្គីភាពរឹងមាំ នៅក្នុងជួរសហគមន៍ ទើបការងាររីកចម្រើនទៅមុខ និងរឹងមាំហើយនៅពេលដែលការងាររីកចម្រើនទៅមុខនោះ។ នៅពេលយើងមានមុខរបរមួយដែលស្ថិតស្ថិរដែលអាចចាកផុតពីភាពក្រីក្រ។
នៅក្នុងឱកាសនោះដែរលោករដ្ឋមន្ត្រីបានផ្តល់អាវយឺតចំនួន១០០ សារុងចំនួន១០០ គោយន្តចំនួន២គ្រឿង ដល់សហគមន៍ដើម្បីបម្រើឱ្យសកម្មភាពអភិវឌ្ឍន៍សហគមន៍។ លោកអភិបាលខេត្តឩត្តមានជ័យក៏បានជួយថវិកាមួយលានរៀលដល់សហគមន៍ទាំងមូល។ គួររំលឹកថា លោករដ្ឋមន្ត្រីបានអញ្ជើញទៅទីនោះកាលពីថ្ងៃទី២២ ខែឩសភា កន្លងទៅនេះ៕
