មន្ត្រីរដ្ឋបាលព្រៃឈើ ត្រូវយកស្មារតីទទួលខុសត្រូវចំពោះវត្ថុតាងផ្សេងៗដែលរឹបអូសបានពីបទល្មើស នេះប្រសាសន៍ណែនាំរបស់ឯកឧត្តមរដ្ឋមន្ត្រី ក្នុងឱកាសចុះសួរសុខទុក្ខមន្ត្រីរដ្ឋបាលព្រៃឈើនៅស្នាក់ការកម្មវិធីព្រៃការពារ និងអភិរក្សចម្រុះសីមាដែលសហការរវាងរដ្ឋបាលព្រៃឈើ និងអង្ការសហគមន៍អភិរក្សសត្វព្រៃ (WCS) កាលពីថ្ងៃទី០៨ ខែវិច្ឆិកា ឆ្នាំ ២០១២ នៅភូមិខ្ទុម ស្រុកកែវសីមា ដោយរួមដំណើរជាមួយឯកឧត្តមទីប្រឹក្សាក្រសួង និងមន្ដ្រីថ្នាក់ដឹកនាំនាយកដ្ឋានជំនាញមួយចំនួនទៀត។
ក្រោយពេលក្តាប់របាយការណ៍ និងបញ្ហាមួយចំនួនពីលោក សួន ធីរស (នាយផ្នែករងរដ្ឋបាលព្រៃឈើសីមា) ឯកឧត្តមរដ្ឋមន្ត្រីបានឲ្យមន្ត្រីប្រចាំការនៅទីនេះ ត្រូវបង្កើនស្មារតីប្រុងប្រយ័ត្នទាំងការបង្ក្រាបបទល្មើស និងការការពារ អភិរក្សសត្វនិងព្រៃធម្មជាតិ ដោយត្រូវសហការជាមួយមន្ត្រីអង្ការ WCS ឲ្យបានជិតស្និត។ វត្ថុតាងផ្សេងៗដែលរឹបអូសបានពីបទល្មើស ត្រូវបមូលរក្សាទុកឲ្យបានត្រឹមត្រូវល្អ ចៀសវាងការខូចខាត បាត់បង ពីព្រោះនេះជាសម្បត្តិរដ្ឋ។
ដោយសារតំបន់នេះជាតំបន់ព្រៃក្រាស់ និងដាច់ស្រយាល រាល់ការចុះបេសកកម្ម ឬធ្វើល្បាតត្រូវទៅជាក្រុម ពិសេសមន្ត្រី WCS ដែលជាជនបរទេស ខ្លាចក្រែមានបញ្ហាដល់អាយុជីវិត ប៉ះពាល់ដល់កិត្តិយសប្រទេសជាតិ។ លោកបានសុំឲ្យនាយខណ្ឌពិនិត្យមើលវត្ថុតាងណាដែលយល់ឃើញថាល្អគួររើសយកទៅរក្សាទុកក្នុងសារមន្ទីរ (ភ្នំតាម៉ៅ) ដូចជាអង្គប់ ឬធ្នាក់ទាក់សត្វ មធ្យោបាយដឹកឈើ មានរថយន្ត ទោចក្រយានយន្តដែលជនល្មើសធ្វើការកែច្នៃ តុបតែង ដើម្បីដឹកជញ្ជូនឈើគេបំបាំងពីភ្នែកសមត្ថកិច្ច ព្រោះវាជាសំណៅ ឬវត្ថុតាងទុកឲ្យកូនចៅជំនាន់ក្រោយបានស្គាត់ បានយល់ពីសម្ភារអស់ទាំងនេះ។
នៅថ្ងៃទី០៩ ខែឆ្នាំដដែល លោករដ្ឋមន្ត្រីបានឈាងចូលពិនិត្យ និងសាកសួរសុខទុក្ខមន្ត្រីរដ្ឋដបាលព្រៃឈើ ដែលកំពុងប្រចាំការនៅស្នាក់ការរងត្រពាំងត្រាច របស់គម្រោងអភិរក្សតំបន់ទេសភាពភាគខាងកើតដែលសហការ ជាមួយរដ្ឋបាលព្រៃឈើនិងអង្កការសង្គ្រោះសត្វព្រៃពិភពលោក (WWF) នៅភូមិស្រែហ៊ុយ ឃុំស្រែហ៊ុយ ស្រុកកោះ ញែក។ នាឱកាសនោះ ឯកឧត្តមសូមកោតសរសើរដល់ការខិតខំប្រឹងប្រែង និងលះបង់គ្រប់បែបយ៉ាងដើម្បីមកបម្រើការងារនៅទីនោះ។
លោកសុំឲ្យមន្ត្រីគ្រប់រូបត្រូវសហការឲ្យបានល្អជាមួយមន្ត្រីអង្គការ WWF លើគ្រប់គម្រោងទាំងអស់ ហើយត្រូវខិតខំសិក្សាបន្ថែមទៀតជាមួយគ្រោងនេះ ព្រោះវាអាចជួយបំពេញបន្ថែមទាំងចំណេះដឹង និងបទពិសោធន៍។ ដោយតំបន់នេះនៅដាច់ស្រយាលពីទីប្រជុំជន គួរនាំគ្នាដាំបន្ថែ ចិញ្ចឹមសត្វទុកគ្រាន់ដោះស្រាយតម្រូវការប្រចាំថ្ងៃ។ លោកសុំឲ្យមន្ត្រីជួយប្រមូលកំណាត់ឈើល្អដែលរឹបអូសបានពីបទល្មើសយកទៅទុកដាក់ឲ្យបានត្រឹមត្រូវ ចៀសវាងទុកចោលហាលភ្លៀង ហាយថ្ងៃនាំឲ្យពុកខូចចោលឥតប្រយោជន៍ រង់ចាំតុលាការដោះស្រាយរួចយកទៅលក់ប្រមូលថវិកាជូនរដ្ឋ។ រស់នៅត្រូវចេះសាមគ្គីគ្នា ជួយយកអសារគ្នាទៅវិញទៅមក ទើបយើងបានសុខ នាយខណ្ឌត្រូវឧស្សាហ៍ចុះមកពិនិត្យតាមដានពីបញ្ហាជីវភាពរបស់មន្ត្រីដែលនៅប្រចាំការនៅទីនេះឲ្យបានញឹកញាប់។ រួមសហការគ្នាធ្វើជំរកស្នាក់នៅឲ្យបានសមរម្យ ទឹក ភ្លើង បន្ទប់អនាម័យក៏ត្រូវតែមាន។ អនាម័យគឺជាកត្តាចំបង ព្រោះជាតំបន់ព្រៃភ្នំដាច់ស្រយាល ក្រែមានជំងឺគ្រុនចាញ់ ដូច្នេះត្រូវប្រុងប្រយ័ត្នគ្រប់ពេល។ នាឱកាសនោះ លោក បានជួយឧបត្ថម្ភថវិកាចំនួន ១ លាន ៤ សែនរៀល ក្នុងម្នាក់បានទទួល ៥ ម៉ឺនរៀល និងសារ៉ុង ។
