មន្ដ្រីជាន់ខ្ពស់ ក្រសួងកសិកម្មបានអំពាវនាវ ដល់ប្រជានេសាទសមុទ្រ ឱ្យចូលរួមការពារធនធានធម្មជាតិ និងគួរជំរុញថែមទៀតក្នុងការបង្កើតធនាគារក្ដាម។ ថ្លែងនៅចំពោះមុខប្រជាសហគមន៏នេសាទ ឃុំជ្រោយប្រោះ ស្រុកកោះកុងជាច្រើនរយនាក់ ក្នុងពិធីទម្លាក់ប្រអប់ថ្មសិប្បនិម្មិត សម្រាប់ជាជម្រកត្រីក្ដាម និងវារីសមុទ្រផ្សេងទៀត។
កាលពីពេលថ្មីៗនេះ លោកច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានកោតសរសើរសហគមន៏នៅទីនោះ ដែលបានរួមគ្នាបង្កើតធនាគារក្ដាមបានល្អដែលធ្វើឱ្យធនធានក្ដាមបានកើនឡើង។
លោកបានមានប្រសាសន៏ទៀតថា ត្រូវតែពង្រឹង និងពង្រីកធនាគារក្ដាម ឱ្យបានច្រើនថែមទៀត ព្រោះទីនេះជាកន្លែងដែលបង្កើតធនាគារក្ដាមមុនគេ ដូចនេះគួរត្រូវធ្វើជាគំរូគេ ដើម្បីឱ្យសហគមន៏ដ៏ទៃទៀតរៀនសូត្រតាម។ សហគមន៏ក៏ត្រូវរៀនឱ្យចេះចិញ្ចឹមត្រីដូចជាចិញ្ចឹមត្រីក្នុងស្រះ និងតាមបែរ។ សូមថែរក្សាការពារស្មៅសមុទ្រឱ្យបាន។
លោករដ្ឋមន្ដ្រីបានស្នើឱ្យខណ្ឌរដ្ឋបាលជលផលធ្វើការសិក្សាថា តើកន្លែងណាអាចដាំកោងកាងបានហើយបើដាំបានត្រូវដាំ ដោយឡែកកន្លែងណាដែលអាចស្ដារព្រៃកោងកាងឡើងវិញបានសូមឱ្យលិខិតស្ដាឡើងវិញ។
លោកអំពាវនាវឱ្យសហគមន៏បានខិតខំទប់ស្កាត់បទល្មើស នៅក្នុងសហគន៏ និងការពារឱ្យបានកន្លែងអភិរក្សជលផល។ ខណ្ឌរដ្ឋបាលជលផលកោះកុងត្រូវផ្សព្វផ្សាយ និងផ្ដល់នូវបច្ចេកទេសទាំងឡាយណាដែលសហគមន៏ត្រូវការ។
ក្នុងពិធីនេះ លោករដ្ឋមន្ដ្រីក៏បានផ្ដល់រោងចិញ្ចឹមមេក្ដាមពងចំនួនមួយ។ ផ្ដល់ពូជត្រីទឹកសា បនិងបង្រៀនពីវារីវប្បកម្មទឹកសាបដល់ប្រជាសហគមន៏នេសាទ។ ជូនពូជស្រូវផ្ការំដួល ២០គីឡូក្រាមក្នុងមួយគ្រួសារដែលពូជស្រូវនេះផ្ដល់ជូនគ្រួសារដែលធ្វើស្រែ។ ផ្ដល់ជូនសហគមន៏អូប័រចំនួនមួយសម្រាប់បម្រើជាប្រយោជន៏ដល់សហគមន៏។
នៅក្នុងរបាយការណ៏របស់ប្រធានសហគមន៏នេសាទឃុំជ្រោយប្រោះ ដែលជម្រាបជូនលោករដ្ឋមន្ដ្រី និងគណៈប្រតិភូអមដំណើរនោះបានឱ្យដឹងថា មកទល់ពេលនេះសហគមន៏បានដាក់ប្រអប់សិប្បនិម្មិតចំនួនជាង៤០០ប្រអប់រួចហើយដើម្បីជាជម្រករបស់ត្រីក្ដាម។ល។ ដែលជាលទ្ធផលឃើញថាធនធានធម្មជាតិដូចជាក្ដាមមានការកើនឡើងគួរឱ្យកត់ សម្គាល់៕
