របាយការណ៍សង្ខេបស្តីពីដំណើរការនៃការអនុវត្តកសិកម្មល្អកម្ពុជា
ថ្ងៃអង្គារ-ថ្ងៃព្រហស្បតិ៍ ៨រោច ខែពិសាខ ឆ្នាំជូត ទោស័ក ពស ២៥៦៤ ត្រូវនឹងថ្ងៃទី១២-១៤ ខែឧសភា ឆ្នាំ២០២០
ការិយាល័យលើកកម្ពស់គុណភាព និងសុវត្ថិភាពផលិតផលកសិកម្ម របស់នាយកដ្ឋានកាពារដំណាំ អនាម័យ និងភូតគាមអនាម័យនៃអគ្គនាយកដ្ឋានកសិកម្ម សហការជាមួយចម្ការវិស្ណុ (Visnuth Farm) សម្របសម្រួលដោយ លោក លន់ វន្នី អនុប្រធានការិយាល័យលើកម្ពស់គុណភាព និងសុវត្ថភាពផលិតផលកសិកម្ម និងលោក សូវ ស៊ីណេន មន្ត្រីការិយាល័យលើកម្ពស់គុណភាព និងសុវត្ថភាពផលិតផលកសិកម្ម បានរៀបចំវគ្គបណ្តុះបណ្តាលស្តីពីការអនុវត្តកសិកម្មល្អកម្ពុជា (CamGAP) ទៅដល់បុគ្គលិក និងកម្មករចំនួន១៣នាក់ ក្នុងនោះស្រី្ត០៣នាក់។
លទ្ធផលក្រោយវគ្គបណ្តុះបណ្តាល និងទស្សនៈកិច្ចសិក្សាក្នុងរយៈពេល០៣ថ្ងៃ បានបង្ហាញថា សិក្ខាកាមទាំងអស់បានយល់ដឹងពីការអនុវត្តកសិកម្មល្អរបស់កម្ពុជា និងអាស៊ាន រួមមានការងារគ្រប់គ្រងក្នុងការដំាដុះ ការលាងសម្អាត ការលើកដាក់ ការវេចខ្ចប់ និងការដឹកជញ្ជូនជាដើម។ល។ ការងារផ្គត់ផ្គង់ផលិតផលលើទីផ្សារជាការងារសំខាន់ ដែលសិក្ខាកាមចាំបាច់ត្រូវចេះកំណត់ និងវាយតម្លៃពីសក្តានុពលនៃគ្រោះថ្នាក់ ដោយផ្តោតសំខាន់លើសុវត្ថិភាពចំណីអាហារ គុណភាពផលិតផល ការគ្រប់គ្រងបរិស្ថាន សុខសុវត្ថិភាព និងសុខមាលភាពកម្មករខ្លួនឯងផ្ទាល់ និងប្រភពដែលបង្កគ្រោះថ្នាក់ផ្សេងៗចំពោះអ្នកប្រើប្រាស់ ដើម្បីធានាគុណភាព និងសុវត្ថិភាពដល់អ្នកបរិភោគ។ ក្នុងនាមជាមន្ត្រីបច្ចេកទេសនៃអគ្គនាយកដ្ឋានកសិកម្ម សូមលើកទឹកចិត្ត និងជម្រុញឱ្យម្ចាស់ចម្ការវិស្ណុ (Visnuth Farm) ដាក់ពាក្យស្នើសុំចុះបញ្ចីជាចម្ការការអនុវត្តកសិកម្មល្អកម្ពុជានៅអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បន្ទាប់ពីកែតម្រូវតាមគោលការណ៍ទាំងឡាយរបស់ការអនុវត្តកសិកម្មល្អកម្ពុជា។
