នៅព្រឹកថ្ងៃទី០៤ ខែកក្កដា ឆ្នាំ២០២៤ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកប្រធានមន្ទីរ និងមន្ត្រីជំនាញនៃមន្ទីរកសិកម្មខេត្តរតនគិរី បានចុះពិនិត្យ និងវាយតម្លៃផលប៉ះពាល់ដំណាំស្រូវ និងដំណាំដំឡូងមី ទទួលរងការបំផ្លាញដោយសារដង្កូវហ្វូងនៅខេត្តរតនគិរី ដើម្បីចាត់វិធានការឱ្យទាន់ពេលវេលា។
លទ្ធផលនៃការត្រួតពិនិត្យបង្ហាញថា ដំណាំស្រូវ និងដំណាំដទៃទៀត មិនទទួលរងផលប៉ះពាល់ពីដង្កូវហ្វូង និងសត្វល្អិតបំផ្លាញនោះទេ។ មិនប៉ះពាល់ដោយសារកន្លងមក មន្ទីរកសិកម្មខេត្ដរតនគិរី បានសហការជាមួយមន្ត្រីជំនាញរួមមាន រដ្ឋបាលក្រុង-ស្រុក ចុះពិនិត្យ និងបានចាត់វិធានការទាន់ពេលវេលា នៅអំឡុងពេលដែលមានការរាតត្បាតតិចតួចពីដង្កូវហ្វូងលើដំណាំស្រូវ និងដំឡូងមី។ មកដល់ពេលនេះ ស្ថានភាពដំណាំមានការលូតលាស់ជាធម្មតា ស្របពេលដែលភ្លៀងបានបន្ដធ្លាក់ជាកត្ដាបង្អាក់ដល់ការកកើតនៃពពួកសត្វល្អិតចង្រៃ ពិសេសពពួកដង្កូវហ្វូង។
នាឱកាសនោះ ឯកឧត្តម ហ៊ាន វណ្ណហន ក៏បានណែនាំដល់ថ្នាក់នាំមន្ទីរកសិកម្មខេត្ដ និងមន្ត្រីកសិកម្មឃុំ បន្ដចុះតាមដានជាប្រចាំ និងសហការជាមួយក្រុមការងារជំនាញពាក់ព័ន្ធ ដើម្បីចុះជួយអន្តរាគមន៍ជាបន្ទាន់ លើករណីមានការរីករាលដាលនៃពពួកសត្វល្អិតចង្រៃ ឱ្យបានទាន់ពេលវេលា សំដៅកាត់បន្ថយផលប៉ះពាល់លើផលិតកម្មកសិកម្មរបស់ប្រជាកសិករ៕
